Bloggers

• Stuart Mudie
• Duncan
  • Mair blethers
  • St. Andro's day, Romanian corbies an ithir blethers
  • Aye here!
  • Freshers' Week
  • A hantle new Edinburgh wurds?
  • YA DANCER
  • A Little Respect
  • Scots Theatre
  • Langauge chynges...
  • Scots Leid Forum

Posts by month

• May 2008
• Jun 2008
• Jul 2008
• Aug 2008
• Sep 2008
• Oct 2008
• Nov 2008
• Dec 2008

Sponsored by

Supporters of

St. Andro's day, Romanian corbies an ithir blethers

Posted by: Duncan

01 Dec 08 - 11:11

Happy St. Andro's day tae awbody! I howp naebody'd neb'll pit out o jynt by ma uisin that spellin o wir parton saunt's name - thon's whit wey ma brither spells his, ye see.

Jings it's fair cauld the day; minus sax whan I got back tae ma hous the nicht... faur ower cauld tae be wearin a kilt! I wadna hae duin it seein hou cauld it wis the day, but ma girlfrein insistit... an wha coud resists thae flutterin eelashes? She's no lang been in Scotland (she's frae Romania), but it's hertsome tae hear her uisin wurds like "wee" naiturally awreidy - maun be the first time I hae been a guid influence on a bodie! She's speired at me tae gie her a len o L. Colin Wilson's "Scots Language Learner" ower the Chirstmas holidays, an ye can rest assured I will. There's ae Scots word she'll no need tae try haird tae maister - Romanian for "corbie" is "corb"!.

I wad encourage aw readers that haes fremmit freins tae try an introduce thaim tae Scots gin ye dinna dae sae awreidy, raither nor keepin it amang wirsels, for wirsels. There micht be fowk that greena wi me, but for masel I think that ane o the best weys tae integrate newly arrivit fowk intae wir cultur an intae wir communities is throu wir leid. It's pairt o sum devolopin ideas in ma pretentious unnergraduate heid, sae brace yersel for mair o this in blogs ower the neist wee while.


In ma hinmaist Medieval Scottish History tutorial we read out Dunbar's "To the Merchantis of Edinburgh." A guid poem an nae mistak, but it fair gart me grue tae hear the wey fowk wis pronouncin things! They did their best, I suppose... still an aw, I wisna aw that impressed by the tutor glossin "gaittis" as "gates" an informin the cless that the by-name "Auld Reekie" haed tae dae wi the smell o the ceity (insert Dundee joke here)! Rest assured I pit her richt.

I wis at the Airdrie vs. Cove Rangers gemme on Setterday. No a clessic cup gemme by onie staundarts, but I wis intresstit tae hear twa-thrie Airdrie fans shout "Fit's aaaaat" in exaggerate North Eist accents whan a Cove player hit the baw wrang. Aiblins dialeck awaurness in Scotland is greater now fowk whiles jalouse?

Exams comin up ower the nesit twa-thrie weeks, sae I'd best awa an study for thaim, howp tae be back on here suiner raither nor later tae fash ye wi ma blethers.

God Bless,
Dunc

Sang o the Week: Guns N' Roses - There Was A Time. I canna trow it! Chinese Democracy is out at lang an last! I've no been able tae stap lissenin tae this braw record syne the first day o release last week, an this is ma favourite sang on it. Wis it warth fowerteen years... I think sae, an mind there's mair tae come frae the studio time o the hinmaist decade. Guan yersel Axl! Play Scotland again!