Bloggers
Thochts fae the burd table
Posted by: Iain Mcgregor
17 Jun 09 - 04:53
Hallo. A'm nae yaised tae this here new-farrant wey o bletherin cawd bloggin bit A'll gie it a shottie. Oo dae ken yin anither yit bit thats nae a baud thing whan oo dae oo micht for hae yin - twa wee grummels thegaither an pit the wurld tae richts. A coud hae bin ootby in the gairden haed the wedder nae chynged an brocht the thunner an lichtnin the ither daywi a caller sauch tae ma auld banes. Oniewey A'm inby haen a wee sate in the front room wi a cup o tea leukin ower the windae it the burds on ma burd table. Thares aw kins fae craws, jaikies, bleckies, stuckies, speuggies, blae-bonnets an Rabbie reid-breist, aw nip-luggin yinanither an squaikin tae be first tae lay intae the auld breid heels A hae juist pit oot. A stertit leukin it the burds lik the fowk o Scotland an thocht thay wirnae muckle unalik. Aw burds maun squaik the self-same leid an hae a orra wittin o ilk-ither, bit the wey whaups wheeple an craws craik an shielfies tweeter it gies iz a leukin the keekin-gless it oor ain Scots leid.
Aw hamel Scots hae the foonds for twa-haundit crack wi onie ither Scots fowk fae onie ither pirt o Scotland an abreed, juist lik burds thit whinner an whustle sangs, thay wad be kent bi ilk ither. Its whan the yin o burds gaither lik a waddin o craws or a reest o stuckies thit thair ain bi-leid sterts, juist lik hamel Scots leevin in yin destrick gabbin a wee bittie unalik fae thair neibors doon the neixt destrick. Darwin lays aff aboot 'geographical isolation' makkin sum burds lik the wrans leevin St Kilda chynge fae thair kizzens the Katie wrans on the mainlaund. This maun hae happent tae the fowk o Scotland in the bygane whan ilka pairt yaised its ain wirds, an the fowk didnae travel ower muckle, and didnae mairry ootby thair ain veelages. Wirds yaised bi fowk in thair ain cauf-kintrae micht be yaised bi somebodie else ower the hulls or doon the glen for summit else makkin the wird hae twa-three chices an the hail bi-leid coud chynge.
Nae maither whit leid onie o the burds yaised thay aw kent fine aboot aetin breid, an wirnae feart o yammerin awa. Weel, ma teas feenisht noo sae A'll gaun oot an dae the messages. Nae doot A'll hae anither girn afore lang. Ta-ta the noo.
Latest posts
Yin day, lest weik whiles oot for a streech, A gotten fair roosed it masel is the whangs in ma buits keepit burstin an ilka time A bowlt doon tae ...
Hallo agane fae ma deck-chyre doon on the green. Its braw haein aw this guid wedder noo, thit brings back mindins tae days lang-syne whan A rin abo...
A taen a phone message the ither nicht fae a eild schuil freen whae wintit iz tae gie a haund wi a Burn’s Sipper, tae a pairtie o towerists in he...
Oor aw telt in the papers thit thares a “credit crunch”, an sillers scant bit leukin oot ma windae ye wadnae ken. Maist families hae twa caurs ...
Weel A haed a veesit back tae ma bairnhead toon o Embrae lest weik whan a freens dochter gaed iz a inveet tae hir feenishin exhibeetion in Embrae ...
Hallo. A'm nae yaised tae this here new-farrant wey o bletherin cawd bloggin bit A'll gie it a shottie. Oo dae ken yin anither yit bit thats nae a ...