Bloggers
Shid wanes text in Scots?
Posted by: Iain Mcgregor
01 Jul 09 - 04:05
Hallo agane fae ma deck-chyre doon on the green. Its braw haein aw this guid wedder noo, thit brings back mindins tae days lang-syne whan A rin aboot mornin tae nicht juist in short breeks, a wee simmit an gaed barfittit whan ma auld bauchles gien ower. Weans noo-a-days wadnae be seed oot athoot thair tosh claithes, Nike shin, an mobile phones thit dooble is computers an tak picters as weel. Maist wad raither text or e-mail yin anither in a furrin leid thin yaise thair ain hamel gab. Nae wunner schuils hae sic a haurd time eddicatin bairns in Scots or Inglis leids.
Alang wi thon, thur days pawrents ir feart tae lat thair littlins dae ocht ootby thair sicht, an wad raither buy thaim new-farrant gemms tae play wi in thair ain bed-chaumer. Forby yon, thay winnae alloo thair wee sookie tae jimp in dubs, rin throu the glaur or paidle in the burn wi the clamjamfrie fae the neibourheid. Ye lairnt mair o the leid, an life itssel fae a guid-gaun stane fecht or biggin a gang-hut doon the widds wi yer maiks, thin onie amount o gemms ye played bi yersel in yer bed-chaumer.
Chynged days, ay, bit mibbie nae aye for the better, an times lang syne wur aye bricht an blithe, bit mibbie tae oo lose mind o the weet, cauld days whan a jeelie-piece wis aw ye haed for denner an a penny-gobstapper wis aw ye leukit forrit tae on the Friday.
Oniewey the cannel in ma heid micht nae be birnin ower bricht, bit afore it gaes oot aw-the-gaither A’ll be back wi anither girn aboot summit.
Ta--ta the noo, an daff-daith whan yer askit tae maw the gress nor synd the dishes.
Click here to post your comment »